Европарламентот го замрзна укинувањето на визите за турските граѓани

Добивај вести на Viber

Европскиот парламент ги запира дискусиите за обезбедување на безвизен режим на Турција, а причината се неисполнетите услови од страна на оваа земја.

„Претседателот на ЕП Мартин Шулц рече дека прашањето ќе биде отворено за дебата повторно кога сите 72 услови ќе бидат исполнети“, изјави денеска холандската европратенички Јудит Сипел.

Шулц не гледа „никакви шанси“ за склучување на договор за безвизен пристап на турски граѓани во шенген зоната, пренесе и Deutsche Welle. Според него „сосема не може да станува збор за тоа“ дека Европскиот парламент ќе започне преговори за ова прашање, ако Анкара не ги исполни сите услови за укинување на визите. По негова проценка Турција засега не исполнила 5 од 72-те услови поставени од ЕУ. Шулц смета дека Турција треба да одлучи кога нејзиниот парламент ќе ги испитува овие точки.

„Невозможно е за Турција да прифати измени во антитерористичкиот закон, бидејќи веќе ги исполнува стандардите на ЕУ. Усвојувањето на промени во антитерористочното законодавство не е елемент од планираниот виза договор со Европа“, ја коментира темата турскиот министер за европски прашања Волкан Бозкир.

Минатата недела ЕК му предложи на Европскиот парламент и на Европскиот совет визите за турските граѓани да бидат укинати од 1 јули. Повлекувањето на влезните документи за ЕУ ​​беше меѓу најважните точки од договорот за бегалците меѓу Анкара и Брисел.

Потсетуваме дека Бугарија прва потпиша со Турција протокол за прифаќање и враќање на мигранти.