Добивај вести на Viber
Штрудла со смокви и крекери од еден српски производител се повлечени од пазарот на Европската унија, откако кај нив било детектирано неколкупати поголемо количество на отровна супстанција охратоксин од дозволеното.
Според прописите на ЕУ, доволено е присуство од само три микрограми охратоксин по килограм производ за возрасни и 0,5 микрограми за деца. Во штрудлите од смокви, според наводите на Националната организација на потрошувачи на Србија, имало преку 15 микрограми, а во крекерите 10 микрограми од оваа токсична материја, што е повеќе дури и од количеството дозволено во Србија.
Согласно европската политика, името на српскиот производител не се открива, а српските инспекциски служби не соопштуваат ниту дали вакви токсични штрудли има на пазарот во Србија или во некоја од другите балкански земји.
„Да има образ и морал, производителот треба сам да се јави, да признае дека имал лоша серија и да им се извини на потрошувачите, бидејќи само на тој начин потрошувачите нема да бидат измамени“, вели Горан Паповиќ, претседател на Националната организација на потрошувачи на Србија.
Охратоксинот А, кој бил пронајден во српските штрудли има потенцијално канцерогено дејство, докажано го уништува уринарниот систем, а во поголеми количества го оштетува и црниот дроб.