ЕУ удри по автомобилските картели - казна од пола милијарда евра

Добивај вести на Viber

Европската комисија казни четири компании од автомобилската индустрија поради тајно здружување во картели. Компаниите ќе мора да платат вкупна парична казна од 546 милиони евра. Станува збор за картели во бродскиот превоз на нови возила, како и во производството на свеќици и системи за кочење.

- Картелите на крај им наштетија на европските потрошувачи и негативно влијаеа на конкуретноста на европскиот автомобилски сектор, во кој во ЕУ се вработени околу 12 милиони работници - изјави еврокомесарката за пазарна конкуренција Маргрет Вестагер.

Во секторот транспорт на автомобили, камиони, трактори и останати големи возила казнети се чилеанскиот бродопревозник ЦСАВ, јапонските превозници „К-лајн“, МОЛ и НЈК, како и норвешко-шведската компанија ВВЛ-ЕУКОР, и тоа за картелско здружување во периодот 2006-2012 година. Според ЕК, овие компании ги транспортирале речиси половина од автомобилите од размената на ЕУ со останатите делови на светот во 2016 година, пренесува „Јутарњи лист“. 

ЕК наведе дека добила информации за уште два картела на пазарот за системи за кочење, во периодот 2007-2011 година, во чии активности учествувале германските компании „Бош“ и „Континентал“, како и ТРВ, поранешната американска компанија која сега исто така е во германска сопственост.