Добивај вести на Viber
Турскиот премиер Реџеп Тајип Ердоган нема да дозволи масовни собири на истанбулскиот плоштад Таксим за 1-ви Мај, денот на трудот. На потенцијалните учесници на првомајските протести им порача „да се откажат од своите надежи поврзани со Таксим“ и да ја прекинат борбата против државата.
Сепак, Ердоган не ги забрани првомајските протести генерално, дури и им понудил на организаторите други локации и ветил дека до нив ќе организира превоз. Тој апелираше да не се нарушува мирот на населението, кое „не сака на улиците да доминираат камења и молотови коктели“.
Левичарските движења во Турција немаат намера да ја почитуваат забраната и веќе најавија дека нема да се откажат од обидот да протестираат на Таксим, плоштадот кој стана симбол на нивниот отпор против Владата на Ердоган.
Уште вчера полицијата употреби солзавец врз членовите на организацијата „Комитет 1 Мај“, во која членуваат претставници на синдикатот и на невладините организации, за да ги спречат да ги најават демонстрациите што се планирани на Таксим.