ЕКСКЛУЗИВНО Кочоска: Министерката Ангеловска самата со писмо бара кредитот од Светска банка да се троши по изборите

Добивај вести на Viber

Дополнителната заменичка министерка за финансии Гордана Димитриеска-Кочоска тврди дека самата министерка за финансии, Нина Ангеловска, со писмо ја известила Светска банка дека итниот поволен кредит од оваа меѓународна финансиска институција од 90 милиони евра, ќе биде повлечен по завршувањето на парламентарните избори во земјава кои ќе се одржат на 15 јули.

Ова Кочоска го тврди во интервју за Фактор, кое ќе биде објавено во наредниве денови. 

Според неа и покрај тоа што во петокот минатата недела Државната изборна комисија донела одлука дека овој заем Ангеловска може и самата да го потпише и парите да се повлечат без потписот на дополнителната заменичка Кочоска, министерката самата со писмо ја известила Светска банка дека кредитот треба да се повлече по изборите.

Како што е познато, станува збор за поволен заем од 90 милиони евра наменет за земјава за справување со корона кризата, но Кочоска одбиваше да го потпише, со образложение дека Владата нема силни аргументи за намената за која ќе бидат потрошени парите. 

За ова Кочоска беше критикувана од Владата дека одолговлекува земање на поволен кредит кој сега за земјава е нужно потребен за големите здравствени потреби, но и за помош на стопанството и граѓаните погодени од економските последици од кризата.

„На овие критики најмногу би одговорила со писмото на министерката за финансии испратено до Светска банка, а кое го добив пред два дена, каде што таа кажува дека иако ДИК одлучи дека министерката може и без мој потпис да го потпише кредитот со СБ, таа сепак, испрати писмо до СБ и кажа дека нема да го потпише кредитот, и ќе го остави за после избори. И тука, не би дискутирала повеќе... Два дена по ред имавме комуникација на Владата, првиот ден разговаравме, вториот ден рековме ќе одиме точка по точка ќе ги разгледуваме прашањата. Веќе вториот ден баравме и некои други податоци во Службен весник, и забележавме дека во февруари министерката веќе има потпишано еден кредит со Светска банка без мој потпис. И се постави прашањето ако тој кредит го потпишало, а веќе беше техничка Влада, зошто да не може овој кредит да го потпише... За овој кредит од 90 милиони евра ДИК јасно и гласно кажа дека министерката може да го потпише кредитот без мој потпис. Значи, нема никаква дилема дека министерката може да потпише без мене, но иако може, еве го нејзиниот одговор.... Зошто, ако е убедена дека итноста на кредитот е голема, и може сама да го потпише. Јас кога би била убедена во ова, би го потпишала. Ако зборуваме дека е за здравство, дека е битно, зошто да имаме дилеми. Јас не би имала дилеми никакви. Нема причини, но очигледно е дека имаме дилеми“, вели Кочоска во интервју за Фактор.

Н.Н.Ф.