ЕГЗОДУС: Докторите ни заминуваат, до кога?

Добивај вести на Viber

Како што покажуваат најновите податоци на Агенцијата за вработување, во Македонија, невработени се 14.135 лица со високо образование.

Она што се забележува е дека расте бројот на магисти и доктори. Од нив, 927 се магистри, а 31 се доктори на науки. Магистри, најмногу има правници и економисти, а сличен е случајот и кај оние со докторат, каде покрај нив се јавуваат и доктори со завршени филозофски науки.

Затоа не е случајно што овие луѓе си ја бараат среќата надвор.

Бавен процес на напредок во кариерата, партизирани институции, низок стандард и плати кои не одговараат на квалификациите, ова според дел од експертите се клучните причини зошто се зголемува одливот на  “мозоци“ од земјава.

Во последните 20 –тина година Македонија се соочува со интелектуален егзодус. Не толку висината на платите, колку другите фактори, како  подобри услови за работа, шанса за побрзо напредување во кариерата, ги тераат високостручните кадри работната кариера да ја градат во странство. Според анализите профилот на високообразованите македонски стручњаци кои се одлучуваат да работат во странство е различен, но најчесто тоа се машински и електро инженери, информатичари, доктори.

Ова одговара на податоците од заводот за вработување.

На пример, лани магистрирале дури 2 202 лица, што на популација од речиси 2,5 милиони е огромна бројка. Споредено со 2012, кога магистрирале 1 000 лица, бројот е дуплиран.

Лани се регистрирани нови 246 доктори на науки, а во 2012 година таа бројка беше 146.  Во 2009 година овие бројки беа 425 магистри и 119 доктори на науки.

-Има неколку фактори кои влијаат на зголемувањето на одливот на мозоци. Ќе набројам неколку, несоодветно вработување во споредба со образованието, неадекватни плати во однос на искуството и образованието, отсуство на почит и ценење на квалитетниот кадар, неприлагодена понуда за потребите на пазарот. Мислам дека клучно за да ги задржиме овие вискоквалификувани кадри е понуда на адекватно работно место а тука мислам на бенефициите, можноста за напредок и заштита на работничките права, и секако адекватна плата. Од круцијално значање за развојот на нашето стопанство и севкупната економија е да се работи на изнаоѓање начини за овие висококвалификувани кадри останат да работата во земјава, изјави неодамна за Фактор, политикологот Соња Стојадиновиќ.

Анализите на дел од невладините организации  покажуваат дека не само високообразовните кадри, туку генерално се повеќе млади лица иднината ја гледаат во западно европските  и преку океанските земји.