Двајца вработени во УЈП ја оштетиле државата за скоро 15 милиони денари
Објавено во: Економија 30 Септември, 2015
Управник и раководител во УЈП Тетово се сомничат за кривично дело злоупотреба на службена положба и овластување.
Тетовската полиција поднесе кривични пријави против Ѓ.К.(51) од Тетово управник во УЈП-Регионална дирекција-Тетово, и С.А.(62) од Македонски Брод раководител во УЈП Тетово.
Тие се осомничени дека не обезбедиле наплата на долг на Авто мото здружение од Гостивар. Вработените не обезбедиле залог на недвижен и движен имот, кој не бил оптоварен со хипотека за кој УЈП водела постапка со АМЗ Гостивар за побарување во извршна постапка.
Управата не можела да ги плати своите побарувања, а недвижниот имот на здружението било под хипотека во корист на ,,Триглав” осигурување.
На овој начин, двајцата вработени по основ на неплатен данок на доход и камата го оштетиле буџетот со 14.884.949 денари.