Донациите на Заеви влегоа во затворите и притворите
Објавено во: Македонија 02 Јуни, 2020
„Сите заедно можеме”, граѓанското здружение зад кое стои како покровител семејството на претседателот на СДСМ, Зоран Заев, соопшти дека започна со реализација на хумана помош за граѓаните кои се наоѓаат во Казнено поправните домови и установи.
Ова е нова фаза во работењето на организацијата, после акциите за донација на хуманитарни пакети за ранливите групи граѓани. Хуманитарната помош вклучува пакети со средства за лична хигиена и одредена количина прехранбени производи.
– Нашата цел е да опфатиме што повеќе Казнено поправни домови и установи. Солидарноста и меѓусебното помагање се нашата водилка. Тука сме за сите граѓани, тука сме да помогнеме. Знаеме дека државата обезбедува услови за овие наши сограѓани, но сметаме дека во ова време помошта им е неопходна и на нив, гласи во соопштението.
Полиција на крајот од април упадна во магацинот каде што се пакуваат производите што ги донира семејството Заеви барајќи документи за потекло на стоката, за што СДСМ го обвини техничкиот министер за внатрешни работи Наќе Чулев дека работи под диктат на претседателот на ВМРО-ДПМНЕ, Христијан Мицкоски.
Изминатиопт период „Сите заедно можеме“ беше цел на жестока критика кај опозицијата, која тврдеше дека со овие пакети Заев ги поткупува гласачите предизборно.