До 10 април: Шилегов ќе ја дислоцира галијата на Македон од Вардар

Добивај вести на Viber

Почна процесот на тргањето на галиите од реката Вардар. Градоначалникот на град Скопје Петре Шилегов рече денеска дека е донесена одлука да се отстрани една од галиите односно таа која е поставена веднаш до мостот на кој требаше да се наоѓа Панорамското тркало.

„Условите се создадени и во рок од 30 дена корисникот на таа, таканаречена, урбана опрема е должен сам да ја отстрани. Во спротивно, тоа ќе го направи Градот на негов трошок, по истекот на овој рок, некаде по 10 април оваа година, рече Шилегов.

Тој вели дека безбедноста на скопјани е на прво место и дека сите анализи и студии што ги направиле укажуваат дека објектите од проектот „Скопје 2014“ кои што се наоѓаат внатре во коритото на Вардар – галиите, сериозно можат да ја загрозат безбедноста од поплави, со тоа да нанесат материјална штета и да ги загрозат животите и здравјето на граѓаните. 

„Од друга страна, пак, расчистуваме со нешто што никогаш не било и никогаш нема да биде Скопје, а тоа е проектот „Скопје 2014“. Дислокацијата на овој објект е втората активност што ја презема градот, по отстранување на споменикот на Ќосето, а е во рамките на неговите ингеренции. Јас очекувам дека и во иднина ќе се создаваат услови, без да имаме финансиски импликации по буџетот на градот или по буџетот на централната власт, да ги отстраниме овие објекти од коритото на реката Вардар. Веќе ги отстранивме фундаментите од таканареченото Панорамско тркало, сега го отстрануваме и бродот што се наоѓа непосредно до Панорамското тркало, со што ги спречуваме можните последици и го враќаме ликот на градот – рече Шилегов.

Сопственик на галијата е Ниче Димовски Македон, а рокот за отстранување е 30 дена. Според планот, таа би требало да биде тргната од коритото на Вардар најдоцна до 10 април годинава.