Директорите на „Стоби“ ќе ги послужуваат посетителите на „Веро вино-фест“
Објавено во: Мои пари 05 Мај, 2015
Директорите на винаријата „Стоби“ ќе ги послужуваат посетителите на нивниот штанд на „Веро вино-фест“ кој почнува утре (среда, 6 мај) и ќе трае до 10 мај на паркингот кај трговскиот центар „Веро Џамбо“ во Скопје. Дел од тимот ќе бидат: Никола Деребанов, генерален директор на компанијата „Перминдекс“ под чија капа е и „Стоби“; маркетинг директорката Јадранка Накова; комерцијалните директори Илија Лазовски и Јадранка Клариќ Кимовска и вработените во секторот комерција.
Идејата е посетителите во релаксирана атмосфера да се запознаат со луѓето кои ја водат винаријата. Притоа ќе може да добијат информации од прва рака за секое вино на палетата на „Стоби“, да дознаат со каква храна е најдобро да ги комбинираат и секако да се дружат.
Дел од понудата на штандот ќе биде и виното „Жилавка“ кое американскиот весник „Волстрит журнал“ на крајот на април го рангираше меѓу топ пет пролетни вина во светот. Ќе може да се дегустира и „Вранец“ од бербата од 2012 година кој во март беше препорачан од реномираниот „Вашингтон пост“ и ја доби оценката – „одличен“.
„Стоби“ имаше штанд и на ланскиот „Веро вино-фест“ каде за четири дена биле продадени околу 4000 шишиња, во просек по 1000 дневно, од висококвалитетното македонско вино на винаријата распределено во четири категории - премиум, елит, класик и традиционални.