Добивај вести на Viber
Имотните листови на членовите на новата српска Влада откриваат дека премиерот Александар Вучиќ, потпретседателот Расим Љајиќ, младиот министер за правда Никола Селаковиќ и министерката задолжена за евроинтеграции Јадранка Јоксимовиќ се „жива сиромаштија“, пишува белградскиот весник „Политика“.
Тие немаат ништо - ниту куќи, ниту станови, ниту автомобили, ниту заштеда - барем не на свое име. Во однос на нив, министерот задолжен за вонредни ситуации Велимир Илиќ, министерот за рударство и енергетика Александар Антиќ, првиот човек на српската одбрана Бранислав Гашиќ и министерот за млади и спорт, ватерполистот Вања Удовичиќ се вистински богаташи - поседуваат станови, куќи, лозја, пасишта, автомобили, кеш...
Останатите членови на кабинетот на Вучиќ се некаде помеѓу - најчесто поседуваат само станови, поретко автомобили од постара генерација и понекоја заштеда во банка.
Новите министри Кори Удовички, Душан Вујовиќ, Снежана Богосављевиќ-Бошковиќ и Срђан Вербиќ се уште не ги доставиле своите имотни листови, бидејќи законскиот рок од 30 дена по изборот на функцијата се уште тече.
Српските граѓани последните четири години имаат можност да „ѕирнат“ што поседуваат функционерите, но податоците не се сосема прецизни, со оглед на тоа што политичарите имаат обврска да го пријавуваат имотот и на лицата со кои се во најблиско сродство (сопружници, деца, родители) но во овој имот јавноста нема увид.
Така, од имотниот лист на Вучиќ може да се види дека тој до крајот на минатата година поседувал стан од 117 квадрати, но во последниот извештај поднесен на 30 јануари овој стан го нема, па се претпоставува дека го оставил на поранешната сопруга и децата.
Со ова, Вучиќ стана веројатно најсиромашниот премиер што го имала Србија. Дури и Воислав Коштуница, кој важи за еден од српските политичари со „најскромен“ имот непроменет во последните 15 години, поседува повеќе - стан во Белград, викендичка и автомобил „југо“.