Дали вреди да се штеди? Дивиденди на понуда, која е најкалорична?

Добивај вести на Viber

Првите „кокичиња“ за периодот што означува делење дивиденди на вложеното на нашиот пазар се повторно докажаните компании со висока корпоративна одговорност „Алкалоид“ и „Комерцијална банка“. Годинава дополнително својот добар имиџ го подобри и ТТК Банка зашто во првите три излезе со конкретна понуда за дивиденда

Доаѓа долгоочекуваниот период во годината кога долгорочните, конзервативни, институционални инвеститори во акции ја прават својата сметка и ги пресметуваат заработките од вложеното.

Засега неколку домашни компании чии акции котираат на нашата берза објавија дека во материјалите од претстојните годишни собранија ќе има предлози за исплата на дивиденда. Очекувано најпрви во објавите се компаниите кои најчесто од Македонска берза ги добивале и годишните награди за транспарентност.

„Комерцијална банка“ објави дека на претстојното акционерско собрание, што ќе се одржи на крај на март, дивидендата за секоја акција ќе биде 500 денари односно 450 денари во нето износ за секој домашен акционер. Во однос на последната пазарна цена очекуваниот принос од таа акција изнесува 3,6 отсто. Тоа значи на парите што се вложени сега, а не пред една година или 10 месеци, на 4 мај на тој што вложил ќе му донесат принос од 3,6 отсто за период од 2 месеци. Вкупниот износ на дивиденда што ќе ја подели „Комерцијална банка“ е 18,5 милиони евра.

Македонскиот фармацевтски гигант „Алкалоид“ објави дека акционерите на 3 април ќе гласаат за дивиденда од 490 денари во бруто износ. За домашните физички лица акционери во таа компанија, кои се и најбројни акционери таму, нето износот е 441 денари. Во споредба со дивидендата исплатена лани за добивката во 2021 година сегашниот износ е зголемен за 11 отсто. Во однос пак на пазарната цена на таа акција нето дивидендата би носела 2,45 отсто, а исплатата би била на 17 мај годинава. Тоа значи дека за акција купена сега приносот за 70 дена изнесува 2,45 отсто. Дополнителен мотив за купување токму на таа акција е тоа што „Алкалоид“ секоја наредна година дава повисока дивиденда од претходната.

Досега се огласи и ТТК Банка од каде соопштија дека бруто износот на дивиденда е 67 денари за акција, а нето износот е едно евро во денарска противвредност. Тоа е принос од 4,5 отсто на вложените средства доколку денеска била купена таа акција на нашата брза. Дивидендата оваа банка декларира дека че ја подели на своите акционери веднаш по завршување на процесот на зголемување на основната главнина, а најдоцна до истек на законскиот рок – 30 септември.

Дивиденди имаат потенцијал да делат и други домашни компании кои и досега имаат извонредна дивидендна историја. И тие наскоро ќе би објават нивните предлог – одлуки за кои ќе се гласа.

foto freepik.com/alexgrash