„Дачија“ го спаси „Рено“ од катастрофа
Објавено во: Свет 17 Јануари, 2014
Компанијата „Рено“, во чиј состав се наоѓа и романскиот производител „Дачија“, 2013-та година ја заврши со раст на продажбата во Европа од четири отсто. Но, без резултатите од романската филијала, „Рено“ лани ќе прокнижеше пад на продажбата на европскиот пазар од 1,5 отсто и покрај лансирањата на новата генерација на моделот „Клио“ и новото урбано СУВ возило „Каптур“.
„Дачија“ која, исто така, ги обнови моделите „Логан“ и „Сандеро“ и го рестилизираше теренецот „Дастер“, забележа огромен раст на испораките на територијата на Европа од дури 22,8 отсто, во споредба со 2012-та година. Сите автомобилски производители во Европа имаа тешка 2013-та година. Едвај 11,8 милиони нови автомобили биле купени во земјите од Европската унија минатата година, што е најмалку од 1995 година. Продажбата на автомобили во 2013-та опаднала за 1,7 отсто во однос на 2012-та, или дури 26 отсто во однос на 2007 година, кога кризата изби во европскиот пазар, покажаа вчера податоците на Асоцијацијата на европските производители на автомобили (АЦЕА). Единствено во Велика Британија продажбата на нови автомобили е зголемена за 10,3 отсто, но затоа пак во Италија и Франција е забележано намалување на нарачките за 7,1 отсто односно 5,7 отсто. Во Германија намалувањето е за 4,2 отсто.