Добивај вести на Viber
Црногорскиот премиер Мило Ѓукановиќ е во посета на САД, каде што лобира Црна Гора да добие покана за членство во НАТО на претстојниот самит на Алијансата во Велика Британија.
Ѓукановиќ се сретна со американскиот потпретседател Џо Бајден и најави дека неговата земја очекува покана на самитот во септември.
„Некој ќе рече дека премногу амбициозно сме ја поставиле нашата цел, во 2006 година тргнавме на патот на соработка преку Партнерството за мир, ја завршуваме четвртата годишна национална програма во рамката МАП, а во изминатите неколку години вредно работевме на приоритетите на кои инсистираа партнерите од НАТО“, додаде Ѓукановиќ.
Главните приоритети на кои Црна Гора мора да работи, покрај борбата со криминалот, се поддршката на јавноста за членство во НАТО, која е само околу 46 проценти, како и реформата на безбедносниот систем, за да се загарантира дека како НАТО членка, Црна Гора безбедно ќе ги чува воените тајни на алијансата и нема да ги споделува со Русија.
Ѓукановиќ истовремено повика и на решавање на спорот околу името за да може и Македонија да ù се приклучи на Алијансата.
„Сакам да обрнам внимание на Македонија, која веќе долго е целосно блокирана во процесот на евро-атланската интеграција. Се сеќавате дека беше најавена нејзина интеграција во НАТО во 2008 година во Букурешт, но поради спорот со Грција тоа изостана. Впечатокот денес е дека Македонија не е поблиску до НАТО во однос на 2008 година, дури можам да кажам дека е и подалеку отколку што беше. Тоа не е наивно прашање, не е прашање само на националната стабилност, туку е прашање на регионалната стабилност, и затоа сметам дека е многу важно да вложиме дополнителни напори за да го продолжиме процесот на евроатланска интеграција на Македонија“, изјави црногорскиот премиер.
Според него, кризата во Украина треба да ги разбуди Европа и САД со порака дека мора да ги завршат процесите на интеграција на Балканот во евроатлантските структури.
И додека Црна Гора ги започна активностите за лобирање во пресрет на септемврискиот НАТО самит, Македонија сеуште е окупирана со изборни активности.