Чулев смирува: Деновиве пристигнуваат обрасците за пасоши
Објавено во: Македонија 11 Март, 2020
Наќе Чулев, техничкиот министер за внатрешни работи, на денешниот брифинг со новинарите порача дека набрзо ќе пристигнат обрасците за оние кои чекаат нови пасоши по редовна постапка.
Иако во моментов за оваа патна исправа чекаат околу 20.000 граѓани, Чулев верува дека комплицираната ситуација ќе се промени штом пристигнат потребните материјали од операторот.
„Ситуацијата со корона вирусот не го спречи интересот на граѓаните за патните исправи. Начелно, рокот за решавање на овој проблем е до крајот на овој месец, но ние имаме ветување дека патните исправи ќе стигнат околу 15/17 март. Околу 20 илјади граѓани чекаат на своите пасоши и верувам дека сето ова брзо ќе се реши“, рече денеска Чулев.
Во моментов има само мал број преостанати образци, а предност имаат само оние кои имаат неодложно лекување во странство. Причина за проблемот кој е на ниво на држава техничкиот министер го лоцира во како што рече досегашното лошо планирање на службите во времето додека на чело на МВР бил актуелниот технички премиер Оливер Спасовски.