ЧИСТКА ВО УКРАИНА: Зеленски назначи нови шефови на разузнавачките и безбедносните служби
Објавено во: Свет 26 Март, 2024
Украинскиот претседател Володимир Зеленски назначи нови шефови на разузнавачките и безбедносните служби.
Зеленски денеска го назначи Олег Ивашченко, поранешен заменик-шеф на Одбранбената разузнавачка служба (ГУР) за шеф на Службата за надворешно разузнавање на Украина – oбјави агенцијата „Танјуг“, повикувајќи се на украинските медиуми.
Зеленски претходно во текот на денот го разреши Алексеј Данилов од функцијата секретар на Советот за национална безбедност и одбрана на Украина и на таа позиција го назначи сега веќе поранешниот шеф на Службата за надворешно разузнавање Александар Литвиненко, пренесе „Украинска Правда“.
Во септември минатата година Зеленски ги разреши министерот за одбрана и шестмина заменици министри за одбрана, веројатно поради неуспешни акции во борбата против руските сили.
Московскиот суд нареди апсење на шеф на Украинската служба за безбедност Васил Маљук, обвинувајќи го за јавно повикување на тероризам. Руската инвазија на Украина почна на 24 февруари 2022 година.