Бузаку со докази против Реџепи во Обвинителството, судот го „замрзна“

Добивај вести на Viber

Во Основното јавно обвинителство Скендер Бузаку денеска доставил докази кои, според него, покажуваат дека поглаварот на Исламската верска заедница, Сулејман Реџепи, сторил кривични дела перење пари и злоупотреба на службена положба и овластување. Според Бузаку, Реџепи преку приватна фирма противправно зел 700 илјади евра од Исламската верска заедница. 

„Пријавеното лице присвоило над 700.000 евра, пари уплатени за аџилак. До ОЈО доставив и други докази кои ја поткрепуваат кривичната пријава. По факура број 1459 исплатени се средства од 600.702 евра за такса за престој во Саудиска Арабија за 840 аџии, односно ИВЗ платила такса по 800 евра за лице преку посредник – приватна компанија. Според правилата и утврдената такса за престој од страна на Министерството за аџилак на Саудиска Арабија, таксата за престој е утврдена на 510 евра по човек, која ИВЗ требала да ја плати директно на сметката на Министерството. Со тоа што Реџепи исплатата ја извршил преку приватна компанија докажува дека целта била дел од парите да присвои“, нагласи Бузаку.

Бузаку очекува обвинителството да ги преземе сите потребни дејствија, а во меѓувреме најави дека ќе продолжи да објавува нови докази за извршени кривични дела од страна на Реџепи.

„Наводите дадени од страна на Сулејман Реџепи во кои се употребени лични навреди упатени до мене тврдејќи дека мојата изјава претставува рекет врз ИВЗ и до него, а со оглед на доставените докази кои ги покажувам денес пред пошироката јавност, јасно може да се заклучи дека единствен рекетар на ИВЗ е Сулејман Реџепи кој преку оваа фактура има присвоено парични средства“, вели Бузаку, кој се смета за легален пголавар на ИВЗ по судската одлука во април годинава.

Од друга страна, порталот МКД објави дека решението Бузаку да биде нов поглавар на ИВЗ не важи, бидејќи Апелацискиот суд го укинал и ја уважил жалбата на Реџепи. 

Од Граѓанскиот суд соопштиле дека жалбата второстепениот суд ја уважил и предметот е вратен на повторно одлучување.