Битиќи: Нови избори би биле удар за стопанството, ќе продолжиме со стагнација
Објавено во: Економија 05 Февруари, 2017
Нови избори би биле голем удар за стопанството, изјави извршниот директор на Стопанската комора на северозападна Македонија, Фатмир Битиќи, во неделното интервју на Радио Слободна Европа.
Според него, во таков случај ќе продолжиме со стагнација, дури и регрес на планираниот економски раст.
„Ние како Стопанска комора на северозападна Македонија веќе на неколку пати сме кажале дека таквата политичка криза директно ќе влијае. Изминатата година ја завршуваме веројатно со рекордно најниско ниво на економски раст, а од друга страна самото стопанство, самите бизниси сè уште продолжуваат да имаат проблеми со ликвидност, со тековното работење, со неподмирување на тековните обврски, овде вклучувајќи ги државните институции, а и раскинување на договори или ставање на некои договори во стагнација, затоа што не можат да ги спроведат поради потешкотиите во нивното спроведување“ - вели тој.
Додава дека од следната влада ќе бараат транспарентност и отчетност, а второ е владеење на правото.