Бразилската компанија Seara Alimentos LTDA остана без лиценца за извоз на месо во Македонија
Објавено во: Економија 06 Јануари, 2018
Со бришење од регистарот на овластени извозници на месо од Бразил и одземање на лиценца се соочи бразилската компанија Seara Alimentos LTDA, која извезува месо и во нашата земја.
Ова го соопштија од Агенцијата за храна и ветеринарство од каде што соопштуваат дека информацијата е добиена преку Министерството за надворешни работи каде пристигнало известување од дипломатско конзуларното претставништво на Федерална Република Бразил во Софија дека на компанијата и е одземена лиценцата за извоз и оти е избришана од регистарот на овластени извозници на месо.
„Како одговорна институција за безбедноста на храната ја информираме јавноста дека по минатогодишните случувања и истрагите во месната индустрија во Бразил, АХВ е во постојана комуникација со амбасадата на Република Македонија во оваа јужноамериканска земја, со која се разменуваат информации за случувањата во месната индустрија, за што се информираат и стопанските комори во земјава“, посочуваат од АХВ.
Оттаму дополнуваат дека увозот на месо во Македонија се врши исклучиво од одобрени земји за увоз и од одобрени објекти и се додава дека секоја пратка задолжително е пропратена со ветеринарно здравствен сертификат со кој се гарантира безбедноста.