„Брако“ до ВМРО-ДПМНЕ: Единствени сме што произведуваме поцинкувана жица во земјава
Објавено во: Економија 04 Август, 2018
Брако е единствена македонска компанија што произведува поцинкувани ажица во земјата. Тендерот е добиен како резултат на добрата цена и фактот дека само Брако произведува ваков тип жица. Со оглед на тоа дека неколкупати досега сме предмет на прозивања од страна на опозициската ВМРО - ДПМНЕ, сакавме јавно да прашаме дали оваа партија сака да го фаворизира домашното производство или заговара увоз наместо раст на домашните компании, вели компанијата „Брако“ како одговор на тврдењата на ВМРО-ДПМНЕ дека претпријатието во кое има удел и вицепремиерот Кочо Анѓушев склучило договор за тендер од помалку од 40.000 евра.
- Јавно се откажавме од сите грантови на државата, од сите тендери за трговија каде јасно кажавме дека нема да учествуваме, но во овој сегмент, поцинкувана жица и мрежа сме единствени и најконкурентни во регионот. Секоја друга понуда е далеку поскапа од нашата, а квалитетот е неспоредлив. Го прашуваме ВМРО - ДПМНЕ дали тендерот треба да го добие посредничка фирма со повисока цена и тоа на штета на македонска фирма и најважно од се на штета на државна институција? Во тој случај ќе се наштети на буџетот на државата бидејќи секој денар плус значи неодговорно трошење на средствата - велат од „Брако“.
Од таму тврдат дека Анѓушев е малцински сопственик, а претпријатието дека нема да егзистира ако не конкурира.
- Ние како компанија сме подготвени за секое сценарио, свесни дека еден од нашите сопственици е Вицепримиер, кој всушност е малцински сопственик. Поставуваме прашање дали не треба да се јавуваме на тендери за производи на кои само ние ги произведуваме тие производи и имаме најдобра цена и секако дали со нашето повлекување ќе се нанесе штета и на државната институција и на нас како компанија, онаму каде сме најконкурентни со цена - прашуваат од таму.
Инаку „Брако“ е лидер во регионот на производство на жичени производи со 96% извоз во 21 држава. Компанијата е пример како една македонска фирма може да се развива и да расте постојано. Брако има голем број странски партнери, големи проекти во светот како што е производство на првите камиони во земјава и своето производство постојано го прошируваме.