Добивај вести на Viber
Бугарската Влада не го промени ставот за изградба на гасоводот Јужен тек, изјави бугарскиот премиер Бојко Борисов. „Ја поддржуваме имплементацијата на проектот Јужен тек, но под услов тој да е во согласност со европските прописи“, рекол Борисов и додал дека неговата земја се уште не добила официјална информација од Москва дека изградбата на овој гасовод се напушта.
Борисов изрази жалење што рускиот претседател Владимир Путин, кога објави дека се прекинати работите на Јужен тек, ја спомена Бугарија како единствена проблематична земја.
„Не само Бугарија, туку уште пет членки на ЕУ ја овластија Европската комисија да преговара со Москва за усогласување на Јужен тек со европските правила“, рекол Борисов.
Тој изразил надеж дека на претстојниот енергетски состанок во Брисел, планиран за утре, ќе бидат отстранети техничките пречки за изградба на Јужен тек. „Ние сме за Јужен тек. Сакаме да биде изграден, но во согласност со европското законодавство“, истакна Борисов.