Бетон цементиран во првиот квартал - Добивката стопена за 16 милиони денари
Објавено во: Економија 22 Мај, 2017
Градежната компанија Бетон АД Штип има многу неповолен прв квартал од годинава кој во споредба со истиот квартал од 2016-та е значително полош со огромен пад на приходите, а со тоа и на добивката. Повеќе фактори може да влијаат врз успешноста на една компанија во првите три месеци од годинава на македонскиот пазар, но добивката сега е значителна намалена и тоа за неверојатни 268 илјади евра.
Во првиот квартал од 2017 Бетон АД Штип според објавениот неревидиран неконсолидиран финансиски извештај бележи пад на приходите 200 милиони денари на само 128 милиони денари, што е прилично лошо со оглед на тоа што компанијата е присутна само на домашниот пазар и нема никакви приходи од странство барем во оваа фаза.
Сосема очекувано во ваков период на намалена оперативна активност да се намалат и расходите, но за жал на Бетон АД Штип нивниот пад не е пропорционален со падот на приходите. Бетон АД Штип и натаму има високи расходи кога се во прашање вработените за кои за три месеци троши 41,5 милиони денари. Набавната вредност на стоките изнесувала 12 милиони денари што е голем скок од лани, додека пак услугите со карактер на материјални трошоци најмногу се намалени, па така од 76,4 милиони кои биле распределени лани, во К1 2017 се издвоени 22,5 милиони денари. Сепак, оперативните расходи на Бетон АД Штип и натаму се доста високи и вкупно изнесуваат 112 милиони денари
Финансиските активности на Бетон АД Штип укажуваат дека во овој квартал се стекнале со нешто над половина милион денари на приходи од вложувања, заеми и камати и курсни разлики додека во првиот квартал лани немале вакви приливи. Расходната страна на финансиите покажува дека Бетон АД Штип нема големи промени при плаќањата на камати и слични обврски со 5,5 милиони денари или речиси идентичен износ како и лани.
Бетон АД Штип со овие параметри оствари оданочена добивка вредна 4 милиони денари, што е за 16,4 милиони денари помалку во однос на претходната година сметајќи ги јануари, февруари и март.
Бетон АД Штип во изминатиот период изведуваше голем број на градежни активности за новите објекти покрај кејот на Вардар во Скопје за нови седишта на владини и државни институции, Музејот на македонската борба, Меморијалниот центар на Холокаустот на Евреите, Македонскиот народен театар, но и други проекти.
Х.С.