Азески преку Анѓушев ќе лобира Владата да ги засука ракавите за патиштата, железницата и гасот

Добивај вести на Viber

Без пруга и патен правец кој е во катастрофална ситуација, Коридорот 8 кој ја поврзува Македонија со Турција и Албанија од едната и со Бугарија од другата страна долги години сведочи за лошата политика на власта кон овие капитални проекти. 

Претседателот на стопанската комора Бранко Азески од село Жидилово кај Крива Паланка побара Владата поенергично да се ангажира. 

Вели дека бизнисот трпи голема штета од лошата инвестициона политика во инфраструктурата. Рече дека Стопанската комора преку својот претставник во Владата, Кочо Анѓушев од денеска ќе лобира сите зацртани инфраструктурни проекти да се реализираат. 

„Има само еден пат кој е во очајна состојба, нема пруга, има инсталација за гас еве овде има и мерна станица но не е искористен. Затоа излеговме овде во Жидилово и врз основа на сознанијата почнуваме интезивно лобирање Владата да ги реализира зацртаните проекти. Во програмата стои дека треба да се изгради експресен пат од Ранковце до Крива Паланка и пат од Крива Паланка до Деве Баир и ние бараме тие проекти да се реализираат во зацртаните рокови. Преку нашиот претставник во Владта ќе лобираме интензивно да се работи на тоа“, рече Азески од Жидилово.

Коридорот 8 е долг 950 километри а 316 километри е делот кој поминува низ Македонија. Вкупната стокова размена меѓу земјите долж коридорот, Турција, Македонија, Албанија и Бугарија е 1,2 милијарди долари. Азески вели дека добро е што Македонија ќе се поврзе со гасовод и со Грција оти овој преку кој Гама носи гас од Бугарија е малку искористен и поради тоа енергенсот е скап.

А.Т.