Албанците се највооружени во Европа, омилен е „Калашот“

Добивај вести на Viber

Во Албанија врие од оружје, а дури 40% од семејствата располагаат со пиштоли или автоматски пушки, покажува извештајот на албанските тајни служби. Се проценува дека Албанија е највооружената земја во Европа кога е во прашање личното вооружување на граѓаните, а омилена пушка е Калашников која е најзастапена.

Тоа е последица на политиката на режимот на Енвер Хоџа кој „трупаше“ оружје во минатото кога Албанија беше изолирана од светот плашејќи се од странска инвазија. По распадот на комунизмот голем број на магацини со оружје беа слободно растурени, а оружјето се „береше“ како овошје од градина. 

Според извештајот на тајната служба ШИШ, оружјето најчесто се крие во домовите, но и на територија надвор од домовите. Албанската Влада предлага четиримесечна амнестија за сите граѓани кои ќе го предадат оружјето. 

Министерот за внатрешни работи Саимир Тахири објави на својот профил на Фејсбук дека кабинетот одобрил нацрт-закон, според кој нема да бидат кривично гонети и казнети оние кои ќе го предадат оружјето до 30 април следната година. Поседувањето на незаконско оружје може да донесе казни до 15 години затвор. Рокот за доброволно предавање на оружјето ќе биде од 1 јануари до 30 април 2017 година.