Акционерски промени во домашните банки: Ќе има ли нов газда на НЛБ до крајот на годината?

Добивај вести на Viber

Ќе има серизони поместувања во акционерскиот капитал во две од четирите најголеми банки во земјава. Владата на Словенија донесе одлука за повторен старт на продажбата на две третини од државната Нова Љубљанска банка (НЛБ) која пак во Македонија е целосен сопственик на НЛБ банка. Иако судбината на подружниците на НЛБ од Љубљана во другите земји во регионов засега не се споменува, се тврди дека и за банката во Скопје ќе се бара нов газда во пакет. На наша територија НЛБ како мнозински сопственик го продаде НЛБ Нов пензиски фонд и сега ова приватно пензиско друштво има нов газда односно го поседуваат Словенците од Сава РЕ. Во меѓувреме, до 8,58 отсто од капиталот со забрзано купување на акции во Комерцијална банка стаса и градежниот бизнисмен Ванчо Чифлиганец преку неговата фирма Адора инженеринг, со што освен што ја промени акционерската структура влезе и во менаџментот на компанијата.

НЛБ ЌЕ ОДИ ДО КРАЈОТ НА ГОДИНАТА

Продажбата на НЛБ од Љубљана не е новина, но словенечката Влада успеа во неколку наврати во последните две години процесот да го развлече и покрај притисокот од Европската комисија. НЛБ е државна банка и во екот на финансиската криза имаше значајни проблеми. Сега се планира продажба по пат на јавна понуда и тоа во брза постапка. Односно треба да се продадат 50 отсто од акциите плус една акција до крајот на годината, а останатиот дел до 75 отсто минус една акција до крајот на 2020 година.

Процедурата за продажба ќе ја води државниот фонд СДХ, исто како и лани кога пред самата реализација процесот не заврши оти понудената цена по акција не беше прифатлива односно се движеше меѓу 55 и 71 милион евра. СДХ веќе го продолжиле договорот со Дојче банка која им уди финансиски совети за продажбата. Процесот на продажба формално ќе започне на 1 август.

Инаку, НЛБ банка од Скопје е една од најуспешните подружници на Љубљанската централа. Во 2017 година нето добивката е 2,12 милијарди денари или 34,38 милиони евра и таа е резултат на зголеменото пазарно учество.

НЕОЧЕКУВАНИ ПРОМЕНИ ВО КОМЕРЦИЈАЛНА БАНКА

Промени има и во акционерската структура на Комерцијална банка. Оттаму завчера известија дека во изминатиот период преку берзански трансакции правното лице „Адора Инженеринг“ се стекнало со дополнителни акции издадени од Комерцијална банка и сега поседува 8,58 отсто во основната главнина на банката. Сопственикот на Адора Инженеринг веќе стана член на Надзорниот одбор на банката и неговата фирма е најголем поединечен акционер во банката.

А.Т.