Airbnb со ограничувања за изнајмување во два града

Добивај вести на Viber

Airbnb воведе ограничувања за изнајмување во Лондон и Амстердам. 

Он лајн платформата за краткорочно домување Airbnb ќе започне со  ограничувања во изнајмувањето на приватни домови во две популарни европски туристички дестинации - Лондон и Амстердам, соопшти компанијата. 

Мерката е донесена поради критиките од некои градови дека растечкиот сектор на домување може да доведе до појава на нелегални хотели. 

Во Лондон Airbnb ќе воведе ограничување становите да можат да се издаваат до максимум 90 дена годишно. Новата мерка ќе биде во сила од пролетта  2017 година.

Амстердам и Airbnb соопштија дека ќе работат заедно за да овозможат сопствениците на куќи да ги издаваат за максимум 60 дена годишно.

Амстердам воведе ограничувања порано, но Airbnb прецизира дека од први јануари на сајтот на компанијата ќе може и автоматски да се осигура дека становите не биле понудени во платформата за над 60 дена годишно, освен во случаите кога сопственикот има лиценца.

Компанијата сепак наиде и на голем број проблеми, бидејќи градските власти и локалните жители се загрижени од брзото зголемување на кириите.

Минатата недела  властите во Барселона најавија дека ќе ги казнат со 600 000 евра Airbnb и HomeAway за нудење на сместување кое нема соодветни дозволи.