98% од договорот меѓу Иран и светските сили е подготвен
Објавено во: Свет 09 Јули, 2015
Ембаргото против Иран може да се одржува за период од 2 до 8 години според крајниот договор меѓу Техеран и „шесторката“ (САД, Русија, Кина, Велика Британија, Франција и Германија), најавил дипломатски извор во Виена, каде се водат преговорите.
Сеуште е можен компромис за ова прашање, додал изворот. Според него ембаргото ќе биде поддржано за одреден период, земјите разговараат за рок од 2 до 8 години, појаснил претставникот.
Според него разговарано е за варијантата за укинување на ембаргото на две фази - во првата фаза ембаргото може да се прекине, а подоцна целосно да биде укинато.
Прашањето за ембаргото е едно од најтешките во преговорите меѓу двете страни. Русија постојано изјавува дека тоа треба да биде еден од првите чекори за да се постигне долгорочен договор. Меѓутоа западните земји сакаат да се задржи за подолг период.
Висок западен дипломатски извор изјавил за „ТАСС“ дека текстот на договорот е 98% подготвен.
Ситуацијата е следнава: земјите едноставно треба да кажат „да“ или „не“ на голем број нерешени прашања, додал претставникот.
Иран и светските сили имаа краен рок да постигнат договор до 30 јуни, но потоа на два пати го продолжуваа до 7 и потоа до 10 јули.
Друг извор од западна делегација во Виена откри дека може уште вечерва да биде објавен договорот.
„Некои страници од документот веќе се печатат“, истакнал претставникот.