ЗОШТО ОТИДОА ВО МИНУС - ГТЦ лани со загуба од над половина милион евра
Објавено во: Економија 05 Март, 2020
Градски Трговски Центар А.Д. Скопје до Берзата го достави финансискиот извештај. Што може да се види од билансот на успех?
Во него се наведува дека во текот на минатата година друштвото остварило вкупни приходи од 224.104.000 денари, или 3,64 милиони евра, кои, како што велат од компанијата во својата објава до берзата, се поголеми за 7 отсто во однос на претходната 2018 година.
Но, затоа трошоците растеле повеќе, односно како што појаснуваат од ГТЦ, а вкупните трошоци изнесуваат 258.453.000 денари, односно 4,2 милиони евра, и тие се за 9 отсто поголеми во однос на претходната 2018 година.
Ова придонело ГТЦ минатата година да ја заврши со загуба, односно негативен финансиски резултат во бруто износ од 34.349.000 денари. Или, минусот на друштвото лани изнесувал 558,5 илјади евра.
За оваа година од компанијата сакаат тоа да се смени и да работат со добивка.
„Целта на нашето работење е да оствариме позитивни резултати во наредниот период за тековната 2020 година, со максимално ангажирање и целосно искористување на капацитетите со кој располага нашето друштво“, се вели во објавата од ГТЦ.
Н.Н.Ф.