ЗОШТО ДРЖАВАТА МУ ИСПЛАТИ 3,2 МИЛИОНИ ЕВРА НА МЖ ТРАНСПОРТ ЗА САМО ЕДЕН МЕСЕЦ - трупаат милионски долгови, а сами немаат ни за струја

Добивај вести на Viber

Македонски железници транспорт само за еден месец, во април, добиле државни пари од дури 3,23 милиони евра.

Податокот може да се најде на владината платформа Отворени финансии, која за секој месец ги објавувба најголемите исплати од државниот буџет на поединечните приматели на средства.

Од овие средства, од Министерството за транспорт и врски се исплатени 161 милиони денари, или 2,6 милиони евра, и тоа за исплата на заостанати долгови на државното претпријатие. 

Инаку, платформата Отворени финансии говори дека најголемата исплата кон МЖ Транспорт се случила на 15 април, кога кон оваа компанија се префрлени 1,7 милиони евра од Министерството за транспорт и врски. Во истиот ден на сметка на државното јавно претпријатие од истиот ресор биле исплатени уште 333 илјади евра, а исплати имало и во неколку други денови.

Фактор праша во Министерството за транспорт и врски со која цел му исплатиле 2,6 милиони евра на МЖ Транспорт во само еден месец.

Од министерството со кое раководи министерот Благој Бочварски велат дека тие средства му се исплатени на МЖ Транспорт со одлука на Влада.

Односно, тие пари од државата ги побарувале МЖ Транспорт со цел да се покријат долгови кои ги направило претпријатието за струја, за гориво, како и за исплата на платата на вработените за март годинава, како и мал дел за некои заостанати долгопви за осигурување.

Од веб страницата на МЖ Транспорт може да се види дека во МЖ Транспорт во моментов се вработени вкупно 941 вработен. Од нив седдуммина се во менаџерскиот тим, а во Дирекцијата работат 191 лице. Во Влеча на возови се ангажирани најголем број работници, 450, во товарниот сообраќај се 175, а во патничкиот сообраќај се ангажирани 118 работници.

Инаку, ресорниот министер Благој Бочварски вчера изјави дека со претстојниот ребаланс на Буџетот ќе бара за неговото министерство плус пет милиони евра. Тој изјави дека средствата што ги има добиено Транспорт со Буџетот не се доволни, па се надева дека неговиот колега, министерот за финансии Бесими, ќе му  ги одобри дополнителните пари, а кои, како што рече, се потребни за  гасификацијата.  

МЖ Транспорт е убедливо најголем државен должник со години по ред. Тоа го покажува листата на борчлии од јавниот сектор која ја објавува Министерството за финансии.

На крајот на март годинава, односно на крајот на првиот квартал, МЖ Транспорт бил убедливо најголемиот државен должник, со доспеани а неплатени обврски од 67,7 милиони евра.

 На крајот на минатата година, пак, долгот на МЖ Транспорт изнесуваше 65 милиони евра, што значи дека за само три месеци е зголемен за 2,7 милиони евра.

Н.Н.Ф.