ЗНАМ: Некои само декларативно се залагаат за соживот и не ги почитуваат симболите на државата во која се родиле

Добивај вести на Viber

Да газиш и кинеш, уништуваш знаме на држава која те израснала, образувала, вложувала во тебе е злосторство, велат од ЗНАМ на Максим Димитриевски. 

Движење ЗНАМ – За наша Македонија најостро го осудува вчерашното дивеење и сквернавење на знамето на Македонија додека се славеше Денот на албанското знаме.

„Секој има право да слави, но нема право да го омаловажува и да не почитува другиот, како и државата. Ваквиот чин покажува дека некој или некои само декларативно се залагаат за соживот и не ги почитуваат симболите на државата во која се родиле, школувале, работат, живеат“, велат од ЗНАМ. 

Движењето ЗНАМ – За наша Македонија може со жалење да констатира дека тоа што вчера се случуваше на многу места низ државата, а особено вандалското однесување на поединци и групи во Скопје и Куманово, со непочитување на законот за употреба на знамињата и уништување и сквернавење на нашето државно, но и знаме на Македонците е за најостра осуда.

Движењето ЗНАМ – За наша Македонија се залага за почитување на законите, за владеење на правото. Токму затоа секој што се однесува спротивно на тие воспоставени демократски принципи, мора да одговара за своите постапки, а не да се крие зад лажната борба за национални права и слободи.

„Јавно ги осудуваме ваквите настани и ја поздравуваме реакцијата на Министерството за внатрешни работи. Очекуваме и Обвинителството да го заврши својот дел од работата и сите оние што го прекршиле законот да ги изведе пред лицето на правдата и истите да бидат санкционирани според законот. Движењето ЗНАМ – За наша Македонија порачува дека секој што има намера да ја дестабилизира Македонија и да го доведе во прашање Уставниот поредок, да ја загрози безбедноста на граѓаните и да предизвика омраза ќе мора да се соочи со последиците. Движењето ЗНАМ – За наша Македонија потенцира дека Македонија е демократска земја во која се почитуваат правата на секој човек, секој граѓанин, на сите етнички заедници што живеат во неа, но не може и не смее да дозволи непочитување на законите и симболите на државата, но и на Македонците. Движење ЗНАМ – За наша Македонија потенцира дека не можеме и не смееме да дозволиме некој, поради остварување на сопствените цели и фрустрациите од изгубените позиции да  ги користи младите луѓе за ширење насилство, омраза и дестабилизирање на меѓуетничките односи“, велат од ЗНАМ.

Премиерот Христијан Мицкоски кажа дека осум лица се приведени за сквернавањето на македонското знаме.