ЗЛАТО ВРЕДНО ПОВЕЌЕ ОД МИЛИЈАРДА ДОЛАРИ: Најдено лежиште меѓу Србија, Македонија и Бугарија
Објавено во: Економија 06 Февруари, 2020
На тромеѓето меѓу Србија, Бугарија и Македонија лежат тони злато.
Дека во јужна Србија на самата граница со Бугарија и Македонија има одлични индикатори за богати наоѓалишта на драгоцени метали потврди канадската истражувачка компанија „Медголд рисурсис“.
Оваа информација ја пренесоа медиумите од соседна Србија кои повикувајќи се на информациите од погореспомнатата компанија, пренесоа дека на само една локација во рамки на проектот наречен „Тламино“ се најдени околу седум милиони тони руда, со околу 680 000 унци, односно 19,3 тони злато, вредни нешто повеќе од милијарда долари.
Истражувањата во таа област ќе продолжат а како што е востановено, содржината на злато на тоа место, во просек изнесува околу три грама по тон.
За споредба, лежишта со грам злато по тон, ако ги следат соодветни количини руда се сметаат за профитабилни.
Инаку, „Медголд рисурсис“ пронашол и слој на руда од околу 40 метри кој содржи 8,32 грама злато по тон и речиси неверојатни 193 грама по тон сребро.