Зеленски ги нападна „Амнести Интернешнл“, откако го искритикуваа дека ги изложува цивилите на опасност
Објавено во: Свет 05 Август, 2022
Украинскиот претседател Володимир Зеленски ја обвини „Амнести Интернешнл“ (АИ) дека се обидува „да амнестира терористичка држава“, мислејќи на Русија, откако претходно тневладината организација посочи дека Киев ги загрозува цивилите во војната против Москва. Според Зеленски, организацијата за човекови права ја префрла одговорноста од агресорот на жртвата.
„Амнести Интернешнл“ во својот извештај за последните четири месеци ја обвини армијата на Украина за користење цивилни објекти како училишта и болници за воени бази, како и за започнување напади од населени области, тактики што се спротивни на меѓународното хуманитарно право.
„Агресијата врз нашата земја е неоправдана, инвазивна и терористичка. Ако некој напише извештај во кој некако се изедначуваат жртвата и агресорот, ако се анализираат некои податоци за жртвата, а се игнорираат постапките на сторителите, тоа е неоправдано и не може да се толерира“, рече Зеленски во редовното видео-обраќање.