Добивај вести на Viber
„Здрава Котлина“ објави пресуда на Вишиот управен суд со која повторно се враќа на почеток процесот за одземената концесија на Еуромакс Ресурси за рудникот „Иловица“. На одлуката, според организацијата, му кумувал Субхи Јакупи, судија од Вишиот управен суд, близок до ДУИ.
Екоактивистите велат дека ова следува откако Еколог купил удел од 25 отсто во Еуромакс Ресурси, а Лазим Дестани од компанијата се сретнал со поранешниот премиер Зоран Заев во Струмица.
„ За аргументите кои стојат во пресудата ќе издвоиме посебно внимание и анализа, но засега само ќе кажеме дека целата аргументација е тешка небулоза и ја објавуваме пресудата во целост за да ја прочитате!
Еве како тетовски Еколог ги решава работите во судството откако без око да му трепне и без никаква бизнис логика ќе инвестира во 25% удели во Еуромакс Ресурси, фирма која веќе има ревизорски ажуриран долг од над 40 милиони долари и одземена концесија.
Секако неопходно беше претходно да дојде во Струмица господинот Дестани на состанок со господинот Заев и да се договорат некои нешта. Во игра е влегување на уште еден инвеститор поврзан со политичарите во Македонија па само го чекаме да се охрабри и формално да се обзнани. Ние веќе и го знаеме...
Ефектите сега ги гледате во форма на пресуди каде се што најавуваме полека се остварува!
Еден од судиите кој постојано е присутен во одлуките на Вишиот управен суд е Субхи Јакупи кој пак е клучно и тесно поврзан со ДУИ но и со најголемиот донатор на ДУИ Еколог од Тетово (инвеститор во Еуромакс)“, реагираат од „Здрава Котлина“.