Захарова: Некогаш убавата вестерн „градина“ целосно избледе, можеби им недостига руско ѓубриво

Добивај вести на Viber

Портпаролката на руското Министерство за надворешни работи, Марија Захарова вели дека Западот покажал „завист, гнев и банална љубомора“. Oва се однесува на вчерашната средба во Москва на рускиот претседател Владимир Путин со кинескиот колега Си Џинпинг. Тема беше војната во Украина. 

„Не го забележаа главното – и двајцата лидери зборуваа за повеќегодишниот конструктивен, а не деструктивен, развој на билатералните односи, што не е во интерес само на нашите две земји, туку и на целиот свет“, коментира Захарова на Телеграм.

Рече дека Германија им забранува на своите компании да ги користат најновите кинески телекомуникациски производи, а Холандија забранува соработка со Пекинг на полето на микрочипови.

„Се разбира, во САД не можат да им простат на Кинезите за тоа што нивните решенија предизвикуваат поголем интерес и се попопуларни од американските програми“, истакна Захарова. 

Вели дека и во времето на пандемијата двете земји си помагале. 

„Некогаш убавата вестерн „градина“ целосно избледе. Можеби им недостига руско ѓубриво што самиот Запад го блокираше. Од друга страна, „џунглата“ е полна со сила, богата со ресурси и суровини, а исто така, можеби најважно, полна со конструктивност и одговорност“, заклучи таа.

Американскиот државен секретар Антони Блинкен не е надлежен да го критикува кинескиот претседател Си Џинпинг за неговата посета на Русија, изјави денеска портпаролот на кинеското Министерство за надворешни работи Ванг Венбин. Кина се залага за мир во Украина. 

Кинескиот претседател три дена ќе престојува во руската престолнина. Украина утрово објави дека уништила руски ракети на Крим.