ЗАЕВ: Утре на владина седница ќе го потврдам разрешувањето на Пауновски, но утрото ќе ги сослушам и аргументите на инспекторите

Добивај вести на Viber

Премиерот Зоран Заев вели дека утре на владина седница ќе го потврди она што го најави, а тоа е да биде разрешен директорот на Државниот пазарен инспекторат, Стојко Пауновски.

Разрешувањето на Пауновски ќе биде една точка на дневен ред на утрешната владина седница. 

Заев всушност како од пушка одговори на новинарското пшрашање за Пауновски, што значи дека се подготвувал за ова прашање и за сите закони и прописи, кои, како што рече не ги почитувал, а требало, Пауновски. 

Вели дека причина за тоа е што Пауновски не ги почитувал законите, а не го почитувал ни етичкиот кодекс.

Сепак, Заев утре ќе ги прими на разговор пазарните инспектори од ДПИ, кои до него ќе ја достават петицијата, со која се бара да не биде сменет Пауновски, и ќе го информираат за сите успеси што инспекторатот ги постигнал за време на менаџирањето на Пауновски.

„Преку мојот кабинет ги информирав почитуваните инспектори дека утрото во 9 часот ќе имаме состанок, на кој ќе ги сослушам нивните аргументи. Седницата на Владата е потоа во 12 часот“, рече премиерот Заев.

Замолен од новинарите да биде прецизен дали Пауновски ќе биде разрешен на утрешната седница, премиерот рече.

„Утре ќе го потврдам на седница тоа што го соопштив претходно на јавноста. Се работи за закон, сите треба да го почитуваат законот. Овде станува збор за непочитување на законот. Исто така се работи и за непочитување на етичкиот кодекс“, нагласи премиерот Заев.

Но, потоа премиерот уште еднаш повтори дека сепак ќе ги сослуша и аргументите на инспекторите на утрешната средба. 

„Секогаш постои отворена можност, затоа и сум закажал состанок и со инспекторите од Државниот пазарен инспекторат, да ги слушнам и нивните аргументи. Чуму тогаш би закажал состанок, ако сум убеден во ставот којшто го соопштив во јавноста. Ги знам прописите, правилата, етичкото поставување, јасно знам каде оваа влада сака да стигне во својата поставеност, служејќи за добробит на граѓаните или слично. Но, секако ниту се сметаме за најпаметни и најинформирани ниту покажуваме каква било сила или моќ. Сакаме да се почитуваат законот за распределба, Законот за Влада, за хиерархиската поставеност на институциите и на крајот, не помалку важно, етичкиот однос на сите кон самите претпоставени, спрема граѓаните и спрема другите институции“, вели Заев. 

Сепак, за како што рече, инаетењето од страна на Пауновски, во Владата постои етички кодекс за однесувањето на фунцкионерите. Дали се почитува тој Кодекс треба да следи вицепремиерот Љупчо Николовски, кој е должен да го извести Стојко Пауновски дека го прекршил етичкиот кодекс. 

„Јас сакам да ве уверам согласно одлуката која ќе ја донесам лично јас, а секако и Владата ќе  постапи согласно правните прописи во државата. И нема да си дозволиме, секако, ништо поинаку, освен постапување по правните происи“, рече премиерот.

Заев вели дека за ова прашање се отворила дебата во јавноста, што е демократски, но, како што нагласи, сака да ја информира јавноста дека Пауновски не сакал да бара решение за проблемот. 

„Сакам да ја известам јавноста дека директорот Пауновски беше детално информиран за неговото непостапување на 5,10 и 21 април од МИОА, а и по повеќе усни укажувања, тој не побара средба, не разговараше и не понуди начин за решавање на проблемот. Инаку, неговиот допис дека овие вработени се неприфатливи до вицепремиерот Груби и до мене тој ги достави уште во јануари годинава“, рече Заев.

Според него, од увидот во образовниот профил, утврдено е дека 24 вработени кои треба да бидат превземени, ги исполнуваат условите. Ова значи дека овие лица може да бидат превземени како административни службеници, тврди премиерот.

„Директорот Пауновски беше писмено известен во врска со оправданоста и начинот на распределбата, со тоа што тој не го прилагодил актот, што е дел на обврска. Со процесот на распределбата се решава децениски проблем. А превземањето на вработните нема импликации за буџетот, затоа што станува збор за лица кои земаат плата, а не одат на работа. Станува збор за законска обрска, за закон кој е донесен во декември 2020 година. Ова е овврска за сите, што се дел од институциите, особено за носителите на одговорните функции“, рече Заев.

Минатата недела премиерот рече дека ќе предложи разрешување на Пауновски, бидејќи, како што објасни, тој влегол во недозволив пркос, по што се кренаа на нозе пазарните инспектори, кои потпишаа петиција и побараа средба со премиерот Заев, на која ќе инсистираат да не биде разрешен Пауновски.

Н.Н.Ф.