РУСКОВСКА Е ОДДАЛЕЧЕНА ОД ФУНКЦИЈАТА, ЗА ТРОЈЦА ОБВИНИТЕЛИ ДИСЦИПЛИНСКА ПОСТАПКА - се огласи Јавното обвинителство

Добивај вести на Viber

Јавниот обвинител во земајва соопшти дека е поведена дисциплинска постапка за утврдување одговорност на тројца јавни обвинители. 

- Во согласност со член 93 од Законот за јавното обвинителство, Јавниот обвинител на Република Северна Македонија денеска поднесе предлог за поведување дисциплинска постапка за утврдување одговорност на тројца јавни обвинители, за кои постои сомнение дека намерно и неоправдано направиле крупна професионална грешка со што сториле тешка дисциплинска повреда од член 91 алинеа 6 од Законот за јавното обвинителство - пишува во соопштението на ЈО.

Тие исто така потенцираат дека во исто време, „врз основа на член 81 од Законот за јавното обвинителство, Јавниот обвинител на Република Северна Македонија донесе Решение за оддалечување од функцијата за еден јавен обвинител додека трае кривичната постапка поведена по поднесена кривична пријава против наведениот обвинител“.​

Со оглед што е поднесена кривична пријава против обвинителката Вилма Русковска, се претпоставува дека суспензијата се однесува за неа. 

Кривична пријава поднесе директорот на Финансиска полиција, Арафат Муареми.