ВОНРЕДНА СОСТОЈБА НА ЈУЖНАТА ГРАНИЦА: Kaкви планови има Трамп за Панамскиот Канал?

Добивај вести на Viber

Новиот американски претседател, Доналд Трамп кој денеска е инаугуриран, кажа дека златната доба на Америка почнува сега. Најавувајќи дека ќе ја стави Америка на прво место, тој додаде дека земјата ќе процвета и ќе биде почитувана.

„Ќе го вратиме нашиот суверенитет, ќе ја вратиме нашата безбедност. Наш главен приоритет ќе биде да создадеме нација која е горда, просперитетна и слободна. Нема да потфрлиме. Од овој ден, Америка ќе биде слободна, суверена и независна држава. Иднината е наша“, изјави Трамп. 

Вели дека Америка наскоро ќе стане поголема, посилна и поисклучителна од кога било.

„Ова е почеток на возбудлива нова ера на национален успех. Сончевата светлина се истура врз целиот свет и Америка има шанса да ја искористи оваа можност како никогаш досега“, рече Трамп.

Тој ги нападна политиките на претходникот Џо Бајден и како се справувал со мигрантската криза.

„Претходната влада им даде засолниште и заштита на опасни криминалци кои илегално влегоа во нашата земја“, додаде Трамп. 

Тој најави дека веднаш ќе почне да потпишува извршни наредби, меѓу кои и прогласување на вонредна состојба на американско-мексиканската граница и означување на наркокартелите како странски терористички организации.

„Илегалното влегување во земјата веднаш ќе биде запрено, а владата ќе почне процес на враќање на милиони криминални странци таму од каде што дошле“, вети Трамп.

Најави дека Америка повторно ќе биде производствена земја и дека ќе ги користи своите резерви на нафта и природен гас.

„Америка повторно ќе биде богата земја зашто имаме течно злато под нашите нозе. Американскиот сон ќе се врати и ќе се развива како никогаш досега“, вели Трамп. 

Тој најави укинување на цензурата и на програмите за различност, еднаквост и инклузија во федералната влада и додаде дека бил сериозен кога рекол дека САД ќе ја повратат контролата врз Панамскиот Канал. Прогласи вонредна енергетска состојба во обид да ги намали цените и најави воведување царини и даноци за странски земји.

Трамп за време на неговото денешно инаугуративно обраќање рече дека „Панама ги прекршила договорите за кои е потребна неутралност во управувањето со каналот“.

„Изгубивме 38.000 животи во изградба на Панамскиот канал. Сега на нашите бродови тешко им се наплатува. Па видете, не ѝ го дадовме каналот на Кина, туку на Панама. Сега ќе си го вратиме назад“, наведе Трамп. 

Тој потсети дека Американците се истражувачи и авантуристи на други континенти и дека не постои сон кој не може да се освои ако нацијата работи заедно.