ВМРО-ДПМНЕ е против зголемување на даноците, имаат друг предлог

Добивај вести на Viber

Потпретседателот на ВМРО -ДПМНЕ Александар Николоски вели дека иако се подотвора вратата за зголемување на даноците, ВМРО-ДПМНЕ е против. 

Вели дека партијата е за ниски даноци и не само што е против зголемување, туку треба да има кратење на постојните даноци. 

„За да се развива бизнисот, треба да му се остави слобода, рамен ДДВ и да има ниско оданочување за средствата да се употребат за развој“, кажа Николоски.

Но, власта има поинакви планови за 2023 година. 

Министерот за финансии Фатмир Бесими на денешниот брифинг ги презентираше даночните реформи преку кои треба да се соберат 54 милиони евра. 

Ќе се воведе данок за реинвестирана добивка кај компаниите која досега не се оданочуваше. Нема повеќе да има поволности за придонесите за доброволниот пензиски фонд. 

Ќе се намали основата за даночни олеснувања за вложување во спортот. Ќе се укинат и преференциите кај премиите за животно осигурување. 

Ќе се оданочува и капиталната добивка од продажба на акции како и каматите од орочените депозити во банките. Ќе се оданочуваат и менаџерските немонетарни бенефити.

За социјалните придонеси ќе се укине највисоката месечна пресметка. Ќе се плаќаат придонеси за задолжително социјално осигурување за договори за дело.