ВМРО-ДПМНЕ Е ПРОТИВ АМБАСАДОРИТЕ ДА ИМААТ ДВОЈНИ ДРЖАВЈАНСТВА: Mилошоски најави дека ќе го блокираат законот со 300 амандмани

Добивај вести на Viber

Опозициската ВМРО-ДПМНЕ е против тоа амбасадорите да имаат двојно државјанство, и ќе го блокира предлог-Законот за надворешни работи.

Пратеникот Антонио Милошоски заедно со неговите колеги пратеници ќе поднесат 300 амандмани, затоа што сметаат дека е погрешно амбасадор на Македонија да има и друго државјанство покрај македонско.  

„Прво, затоа што измената е произволна и претставува обид законот да се прилагоди на неколку персонални решенија на владините партнери за пополнување на амбасадорски позиции. Второ, овие измени се спротивни на Законот за класифицирани информации според кој неопходен предуслов за кандидатот за амбасадор  да добие “безбедносен сертификат со степен Државна тајна" е да не е државјанин и на друга држава, а амбасадор без безбедносен сертификат не е амбасадор. Трето, затоа што дипломатијата, како и безбедноста, е сензитивна професија каде лојалноста кон матичната држава Македонија не смее да биде доведена под знак прашалник, напиша Милошоски на Фејсбук

Премиерот Зоран Заев вчера кажа дека на оваа тема треба да се дискутира, затоа што имаме дијаспора која има двојни државјанства. Тој не даде прецизен одговор дали е за или против двојните државјанства.