ВЛАДАТА ЌЕ ИНКАСИРА 9,5 МИЛИОНИ ЕВРА ОД ДИВИДЕНДА – еве како ќе се распредели добивката од „Македонски телеком“

Добивај вести на Viber

Домашниот телекомуникациски гигант, „Македонски телеком“, преку Берзата објави дека добивката што компанијата ја остварила во минатата година, ќе биде распределена за бруто дивиденда.

Станува збор за сума од 1,67 милијарди денари, или прецизно 1.667.793.739 денари, или изразено во евра, станува збор за 27,12 милиони евра.

Со оглед дека македонската Влада во Телеком поседува 34,81 отсто од акциите, значи дека таа има право на дивиденда во бруто износ од 9,45 милиони евра.

Додека, пак, како што е познато, акционерското друштво за деловен менаџмент и други консултантски услуги „Камени мост комуникации“, поседува 51 отсто од акциите на оваа телекомуникациска компанија, односно управувачкиот пакет. Со оглед на својот процент, излегува дека „Каменимост комуникации“ ќе има дел од дивидендата од 13,8 милиони евра.

Самиот „Телеком“, пак, поседува 10 отсто од обичните акции на компанијата.

Инаку, одлуката за распределба на добивката ја донело Собранието на акционери на компанијата на својата вчерашна седница.

„Собранието на друштвото ја распоредува нето добивката остварена по финансиските извештаи на друштвото за 2022 годиона во согласност со усвоените меѓународни стандарди за финансиско известување објавени во Службен весник, во износ 1.667.793.739 денари, за исплата на бруто дивиденда во која се вклучени сите даноци, доколку е применливо, и кои ќе бидат задржани и платени од бруто дивидендата согласно важечката даночна регулатива во РСМ на датумот на исплата“, се вели во објавата.

Во одлуката за дивидендниот календар се вели дека Собранието на друштвото ја одобрува исплатата на дивидендата за 2022 година, кој согласно одлуката за распоредување на нето добивката на друштвото претставува нето добивка остварена по финансиските извештаи на друштвото за ланската година.

Бруто износот на дивидендата по акција е 19,34 денари.

Друштвото од бруто износот на дивидендата, доколку е применливо, при исплатата ќе ги задржи и уплати сите даноци согласно важечката даночна регулатива.

„Датумот на пресек на акционерска книга според кој се определува листата на акционери кои имаат право на дивиденда за 2022 година е 14 јули годинава. Последен датум на тргување со право на дивиденда е 12 јули, а прв ден на тргување без право на дивиденда е 13 јули годинава. Исплатата на дивидендата за 2022 година ќе се изврши до 30 септември годинава“, се вели во објавата за дивидендниот календар.

Н.Н.Ф.