Трета жртва на грипот: Расте и бројот на заболени
Објавено во: Македонија 20 Февруари, 2020
Трета жртва од сезонскиот грип - почина педесетгодишен човек за кој од Институтот за јавно здравје соопштија дека имал хронични болести. Починал на институтот за пулмологија, каде и се лечел. Претхдно од грип почина малолетно девојче и 85-годишник.
Д-р Гордана Кузмановска од Институтот за јавно здравје рече дека впрочем трите жртви имале хронични заболувања, не биле вакцинирани против грип, биле третирани со антивирусна терапија и биле позивини на инфлуенца АH1 поттипот.
Таа соопшти дека има зголемена активност на грипот во државава и регистрирани се 5.660 заболени од грип, што е зголемување за 74 отсто.
Во меѓувреме, од Министерството за здравство соопштија дека Комисијата за заразни болести редовно ја следи состојбата со грип во државата и согласно стручните препораки се забранети посетите на хоспитализирани пациенти во јавните здравствени установи, со цел да се спречи натамошно ширење на грипот. Исто така, посочуваат, Комисијата ја следи состојбата со новозаболени деца во училиштата и во зависност од проценките ќе предлага нови мерки и препораки, согласно состојбата на терен.
Одговарајќи на новинарско прашање д-р Кузмановска рече дека комуницираат постојано со патници, наши и странски граѓани кои влегуваат на еден премин, излегуваат на други премин соодветно на сите процедури кои се востановени и практично се имплементираат на нашите гранични премини и сувоземни и на аеродромот.
– Пристигнуваат шест од работниците од Кина, кои таму беа подложени на 14-дневен карантин пред нивното доаѓање, а кои работат во западниот дел на државава. Тие ќе бидат соодветно пречекани од наши здравствени работнции и во зависност од тоа каква им е здрвствената состојба, во каква состојба се, после земена епидемиолошка анкета ќе се утврдат натамошни мерки. Можно е нивно 14-дневно задржување и тука во нашата држава пред да почнат со работа, истакна д-р Кузмановска.