Тешко ќе се реши името, тврди грчки политичар
Објавено во: Балкан 23 Март, 2018
Потпретседателот на опозициската Нова демократија, Костис Хаѕидакис, во интервју за грчката телевизија Скај вели дека личната проценка е дека прашањето за името е тешко да се реши, а со тоа и тешко дека евентуален договор би стигнал до грчкиот Парламент.
Тој вели дека од другата страна не постои соодветен одговор и очекуваат да видат што ќе се случи во следните денови.
„Се чини дека прашањето е многу тешко да се реши затоа што и од другата страна, од страна на Скопје не постои потребната флексибилност. Да ви кажам најискрено, ова не е нешто што ме изненадува“- вели потпретседателот на опозициската Нова демократија, кусо откако заврши прес-конференцијата во Скопје на шефовите на македонската и грчката дипломатија.
Костис Хаѕидакис не е оптимист дека актуелната грчка Влада би можела да донесе догвор во Парламентот, а доколку го стори тоа, според него, по реакциите кај народот, ќе смени тактика.
„Ако донесе не исклучувам различни начини да ги најде гласовите што се потребни за да помине во Парламентот. Но, сигурен сум дека ако донесе таков договор врз база на сегашните факти, би постоеле големи реакции од народот и бидејќи во СИРИЗА не се наивни, може да ја следат тактиката на одложување, нешто да направат и да не го донесат“ - рече Хаѕидакис за ТВ Скај.
Сепак тој повторува дека ова е само негова лична проценка.
Грчкиот министер за надворешни работи, Никос Коѕијас денеска е во посета на Македонија на средби со државниот врв.