ТАВ ќе воведува бездопирни технологии на аеродромите во земјава: Некои земји ќе бараат тестови за Ковид-19 за патниците

Добивај вести на Viber

ТАВ ќе инвестира во следниот период во бездопирни технологии и на таков начин ќе се обезбедува сигурноста и заштитата од ширење на вируси. Од компанијата за Фактор велат дека кога станува збор за Ковид-19 во иднина, кога ќе се отворат аеродромите, зависно од кризата, некои земји може да бараат сертификати за тест за КОВИД-19, за да ги примат патниците во нивните земји. Сепак нема потврда кога ќе се отворат двата аеродроми во земјава, а за тоа вчера прецизен одговор не даде ни министерот за здравство Венко Филипче.

„Сè уште е рано да се зборува за драматични промени кои ќе бидат имплементирани веднаш. Во првата фаза сите аеродроми ќе применуваат засилени санитарни мерки. Главната цел е да се спречи евентуалното ширење на вирусот од влезот на терминалната зграда сè до авионот, со примена на овие санитарни мерки, и да направиме луѓето да се чувствуваат безбедни. Како и да е, сигурно е дека одредени процедури ќе се сменат во иднина. На пример, аеродромите ќе инвестираат во бездопирни технологии. (touchlesstechnology). Зависи од развојот на кризата со Ковид-19, некои земји можат да бараат сертификати за тест за КОВИД-19, за да ги примат патниците во нивните земји, велат од ТАВ за Фактор.

Оттаму велат дека ги следат меѓународните искуства, препораки и упатства за враќањето на аеродромските операции по КОВИД-19, како и националните прописи. Во моментов се подготвуваат за повторно отворање на аеродромите и се надеваат дека тоа ќе се случи што поскоро.

Во моментов од двата аеродорми има само карго-летови и хуманитарни летови за враќање на македонските граѓани во земјава. Драстичното намалување на бројот на летови доведе до големо намалување на бројот на патници,при што во април, велат од ТАВ, има пад за 99 отсто на бројот на патници споредено со април 2019, а во периодот јануари-април бројот на патници опаднал за 38 проценти во однос на истиот период од 2019 година.

„Затворањето на аеродромите значи запирање на приходите, така што бараме решенија за да ја надминеме ситуацијата. Кризата предизвикана од вирусот КОВИД-19 значително ја погоди авијациската индустрија на светско ниво, а тој негативен ефект ќе се чувствува одреден период и по нормализација на состојбата, додаваат од ТАВ.

Моментно најголем дел од вработените работат од дома.

А.Т.