Студеното време однесе три жртви во Бугарија
Објавено во: Балкан 30 Декември, 2014
Во текот на невремето во Бугарија три лица го изгубиле животот од синоќа до денеска попладне, а студеното време е сибирско, јавуваат локалните медиуми.
Еден пациент починал во амбулантното возило кое се заглавило во снегот на патот кон болницата во градот Лом, на северот од Бугарија, јавува Бета.
Еден 56-годишник починал во својот автомобил заглавен на патот кај Врача, на северозападот, а еден 90-годипник починал во дворот на куќата во која живеал сам во селото Барзина во истиот регион.
Цивилната заштита само денеска спасила 320 лица и откопала 640 завеани возила на северот од Бугарија каде десетици села се без струја бидејќи силниот ветер ја искинал мрежата.
Снегот ослабнал, а температурата опаднала на -12 степени и ќе продолжи да паѓа, достигнувајќи утре и во новогодишната ноќ -15 степени или уште помала од таа.