СРБИЈА НИ ДОНИРАШЕ НОВА ПРАТКА ВАКЦИНИ: 40.000 вакцини Спутник V денеска стигнаа во Македонија

Добивај вести на Viber

Во Македонија денеска пристигна втората донација од Србија. Премиерот Зоран Заев информираше дека станува збор за два пати по 20.000 дози од вакцината Спутник V, при што изрази огромна благодарност до претседателот на Србија, Александар Вучиќ, и останатиот државен врв.  

Рече дека со ваквиот благороден пријателски гест на соседна Србија ќе може непречено во Македонија да продолжи вакцинацијата чиј старт беше вчера. Истовремено, Заев апелираше граѓаните масовно да се пријават за вакцинација, бидејќи единствениот излез од пандемијата е само доколку има огромен број вакцинирани.

– Подготвена е салата „Борис Трајковски“, подготвени се вакциналните пунктови во сите градови и продолжуваме со масовна вакцинација – рече Заев.

Премиерот нагласи дека сите вакцини се сигурни и безбедни, дека не постои причина граѓаните да стравуваат.

Од една вијала на Спутник V може да се вакцинираат 10 луѓе, истакна министерот за здравство Венко Филипче, нагласувајќи дека по отворањето, оваа вакцина треба да се аплицира во рок од два часа.

-Масовната вакцинација со оваа донација од Србија ќе се спроведува во Спортскиот центар „Борис Трајковски“. Сега кога се достапни овие вакцини, процесот непречено ќе се спроведува и ќе бидат вакцинирани вработените во државната инфраструктура.  

Македонија досега има вкупно 78.000 вакцини, од кои 48.000 се донација од Србија.