Спасовски: Четвртиот сет економски мерки веднаш по формирањето на Влада
Објавено во: Македонија 27 Август, 2020
Оливер Спасовски денеска ја одржа последната прес-конференција како технички премиер во заминување и најави дека четвртиот сет на економски мерки за справување со последиците предзвикани од пандемијата ќе бидат донесени и имплементирани веднаш по формирањето на новата Влада.
Пакетот за зголемување на јавната потрошувачка ќе биде за пензионерите кои имаат пензии до 15 илјади денари, за невработените кои не се пријавуваат во Агенцијата за вработување и за самохраните родители.
„Преку трите сета економски мерки за засегнатите групи граѓани и погодените сектори, туризмот и угостителството поделени се домашни платежни картички за купување македонски производи и ваучери за домашен туризам. За бизнисите овозможени се бескаматни кредитни линии. Се подготвува четвртиот сет мерки со кои што ќе биде проширен опфатот на граѓани и бизниси кои што ќе добијат финансиска поддршка од државата“, рече Спасовски.
Тој најави дека четвртиот пакет нема да содржи само платежни картички за граѓаните, туку ќе има и мерки за бизнисите.