ШТО ТОЧНО НОСИ ТРГОВСКИОТ ДОГОВОР МЕЃУ САД И КИНА? Еве ги сите детали, царината е намалена за 115 проценти

Добивај вести на Viber

Кина и САД објавија дека постигнале трговско примирје по разговорите одржани за време на викендот во Женева. Повеќето тарифи и други заштитни мерки ќе бидат укинати почнувајќи од среда, соопштија двете страни.

САД се согласија да ги намалат дополнителните тарифи за кинеските стоки од 145 на 30 проценти, додека Кина истовремено ќе ги намали своите тарифи од 125 на 10 проценти. Сепак, царините воведени пред 2 април - вклучувајќи ги и оние од првиот мандат на поранешниот американски претседател Доналд Трамп - како и некои ограничувања, како што е елиминацијата на исклучоците за пратки со ниска вредност, засега остануваат на сила.

Привремено намалување на царинските давачки и укинување на спорните прописи

Вашингтон вети дека ќе измени или укине три извршни наредби со кои се зголемија царините за кинески увоз за вкупно 115 проценти. Таканаречените царини за „Денот на ослободувањето“ ќе бидат привремено намалени од 34 на 10 проценти во текот на следните три месеци, додека сите царини воведени за време на ескалацијата на трговскиот конфликт ќе бидат укинати.

Кина објави дека ќе ги усогласи своите мерки со повлекувањето на царините од страна на САД и ќе задржи само 10 проценти од царините воведени по 2 април. Сепак, кинескиот извоз сè уште ќе биде предмет на вкупна царина од околу 30 проценти, ако се земат предвид претходните мерки, вклучувајќи ги и двата круга царини наметнати за контрола на увозот на фентанил во февруари и март.

Производи како што се електрични возила, челик и алуминиум сè уште ќе бидат предмет на посебни тарифи донесени во претходните години.

Отстранување на нецарински мерки

Кина, исто така, се согласи да повлече некои мерки воведени врз САД по 2 април. Тие вклучуваат контрола на извозот на ретки минерали, истрага на кинеската подружница на американската хемиска компанија „Дупон“ и ставање на црната листа на американските одбранбени и технолошки фирми.

Договорот предвидува дека споменатите компании ќе бидат отстранети од црната листа, а истрагите ќе бидат суспендирани. Сепак, мерките воведени пред 2 април - вклучувајќи санкции против десетина компании и истрага за Google - остануваат на сила. „ДуПонт“ сè уште не ги коментираше најновите случувања.

А што е со ретките минерали?

Сè уште е непознато дали Кина ќе ги ослободи САД од контролата на извозот на ретки метали, бидејќи првичната одлука на кинеското Министерство за трговија се однесуваше на сите земји и не ги споменуваше конкретно САД. Министерството побара од сите извозници да побараат дозволи за испорака на седум видови ретки минерали, како што е литиумот, но во соопштението не е наведено за кого конкретно се однесуваат мерките.

Како што претходно објави Ројтерс, американските клиенти би можеле да се соочат со долг и неизвесен процес на лиценцирање поради трговскиот конфликт. Министерството за трговија на Кина не одговори веднаш на прашањата за овие ограничувања, додека портпаролот на Министерството за надворешни работи им наложи на заинтересираните страни да го проучат текстот на договорот.