Што напишал на Твитер напаѓачот од Лувр?
Објавено во: Свет 04 Февруари, 2017
Мажот кој вчера со мачета ги нападна војниците кај музејот Лувр во Париз, објавил пораки на Твитер во кои се споменуваат џихадистичката група „Исламска држава“ и „браќата во Сирија и борците во целиот свет“, соопштија денеска извори блиски на истрагата.
Како што навел извор близок на истрагата, тие пораки се објавено „на профилот на Твитер кој можеби му припаѓал на напаѓачот“. Уште трае вештачењето на мобилниот телефон iPhone 7 и iPad-от на напаѓачот чиј идентитет уште не е официјално потврден.На профилот на Твитер на име Абдулах ал-Хамими, во петокот неколку минути пред нападот, објавени се неколку пораки на арапски јазик. Првата била во 9.31 часот по локално и средноевропско време: „Во името на Бога (…) за нашите браќа во Сирија и борците во целиот свет“. Една минута подоцна објавен е следен „твит“ во кој се споменува џихадистичката група „Исламска држава“.
Сопственикот на овој профил меѓу 9,27 и 9,34 часот испратил најмалку десет пораки, а нападот во Лувр е извршен во 9,50 часот. Напаѓачот во пораките споменува и патување од Дубаи во Париз на 26-ти јануари, што одговара на термиот на патувањето на осомничениот,
Во петокот ноќта радиото France Info јави дека мажот кој ја нападна воената патрола во комплексот на Лувр, е доселеник од Египет, кој во Франција допатувал на крајот од јануари годинава. Според информациите на телевизискиот канал LCI, станува збор за 29-годишниот маж по име Абдула. Неговото име било дознаено од мобилниот телефон, пронајден кај напаѓачот.
Се прави ДНК анализа и експертиза на отпечатоците на палците за точно да биде утврден неговиот идентитет. Француските правосудни органи стапиле во контакт со своите колеги од Египет, за проверување дали египетските безбедносни служби имале сознание за него.