Шилегов сака Универзална да се реставрира, а да гради и нова сала - најавува референдум

Добивај вести на Viber

Можен е и референдум за ликот на Универзалната сала, најави денеска градоначалникот на град Скопје Петре Шилегов. Два дена јавноста се бранува за конкурсот што градот го објави за парк сцена кај старата Универзална. Шилегов денеска одржа брифинг на кој ги објаснуваше сите опции за салата која е обележје на главниот град. Додека граѓаните сметаат дека таа не смее да се чепка односно треба само да се реставрира, Шилегов вели дека и тоа е опција. Впрочем имало три идеи, но за сите се потребни и доста пари. 

Лично градоначалникот смета дека најдобро е постојната сала да се реставрира, а на друго место да се изгради и нова поголема сала. Во таа насока следните чекори би биле распишување конкурс за реставрација на Универзална сала, како и конкурс за одредување локација за уште еден, нов објект од таков вид.

„Втората опција е на друга локација да се изгради нов објект, а третата за реставрација на постојната и изградба на нова мултимедијална сала на нова локација. Јас лично би сакал да се реализира третата опција. Со тоа, Универзална во постојната големина би останала, а Скопје би добил нов објект во кој би биле сместени и други културни институции како Театарот за деца и млади, Танец, а би имало и конгресен центар. Јас овие идеи ги отворам, за нив да се произнесе и Владата, стручната јавност но и граѓаните. Ако треба, ќе имаме и референдум за ова прашање“, рече Шилегов.

Парите за кој било проект ќе се бараат од Владата. За нов поголем објект би требале околу 20 милиони евра. Досега, од буџетот на државата за овој проект на Град Скопје му се одобрени само пола милион евра.

Градоначалникот вели дека треба да се донесе оптимално решение и салата да се користи во следните 30 до 50 години.