СЕКОЈ ПЕТТИ МАКЕДОНЕЦ Е СИРОМАШЕН: ВМРО-ДПМНЕ го обвини Заев дека ништо не направил за овие луѓе
Објавено во: Економија 14 Октомври, 2019
Секој петти Македонец живее во сиромаштија. Официјално во оваа категорија спаѓаат 480.000 луѓе или 22.2 отсто.
„Пред 4 години ветивме дека кога ќе имаме можност да ги водиме институциите нема да се срамиме да им погледнеме на најранливите во очи. Денес сме горди на чекорите. 30.000 домаќинства земаат повисока социјална помош и над 22 илјади деца користат детски. Меѓутоа, она што сакам да го истакнам е дека целосно го менуваме начинот на кој се грижиме за ранливите групи граѓани. Точно е дека значително ја зголемуваме финансиската помош која ја добиваат, но истовремено овозможуваме поддршка за вработување, ги зајакнуваме услугите во заедницата и инвестираме во ран детски развој. Бидејќи сиромаштијата не треба да се пренесува од генерација на генерација“, истакна министерката за труд и социјална политика, Мила Царовска.
Од ВМРО-ДПМНЕ велат дека премиерот, Зоран Заев не направи ништо за намалување на сиромаштијата. „Само во еден ден град како Делчево го напуштиле 1000 жители, тоа е директна последица на слабата економија и сиромаштијата во која е втурната државата. Наместо развој три години имаме стагнација. Наводната мерка за покачување на минималната плата е само на хартија. Работниците го враќаат таканареченото покачување на рака на газдите. Власта е нефункционална и институциите не си ја вршат работата“, велат од партијата. Додаваат дека со Зоран Заев и СДСМ сиромаштијата нема да се намали, напротив ќе се продлабочува.